كتب.. جان بو جدعون | حوار بين ملحم وجورج ..

# حوار بين ملحم وجورج ..

 

ملحم: حبيبي إنت وروحي إنت …جورج نأزتني ..فتحت الباب بسرعة وأنا كنت عم صلي ليش جايي بهالوقت؟!!

_جيت يا ابو مجد لأني قرفت متلك …

ملحم: انا قرفت يمكن معي حق لأني كبرت وشبعت من هالأوباش الحاكمين ..بس إنت بعد بكير تقرف ..تركتو لوحدو ل (جو ) وصل صوتو لهون ودموعو قبل ما توصل ..شو صار معك..

_جورج : رحت غني بسوريا لإقدر طعميه ل جو متل ما قالت إمي ..أنا ومسرّب بالليل ..

_ملحم: كنت وحدك ..؟؟

_جورج : لا كنت انا وزينة يللي بترافقني بشغلي ..قطعت المصنع وبهالطريق..

_ملحم: ما تقلي فتت بحيط الباطون يللي مش حاطنلو إشارة ولا إنارة

_ما غيرو ..

_شو هالعكاريت بعدن تاركينو هيك من إيام بيي….ما رح بيساووه غير ما يفوت فيه إبن حدا من هالنصابين أو بيو..جيت بوقتك فرفح قلبي ..ٱخ يا قلبي ..

_خبرني أنا وين …؟؟

_إتطمن إنت بين أحضان الحنونة ..دقيقة وهلق بيشع النور وبتضهر بتستقبلك مع يسوع..

_قديش ناطر لشوف وجها ..قولك كيف فيي أعطيه هاللعبة ل جو لأنو جايبلو ياها معي .

_فرجيني ياها ..جايبلو قلب بيضوي وبيطفي وبيرقص وبيغني ..ليك شو حلو..وبيخبط لحالو ..فيي اغمرو شوي..بيحسسني بطرقة قلب مرتي وولادي…

_سامع كأنو في عجقة جوا …

_مظبوط كل الأحبة صاروا هون انبسط يا ابو جريج إختاروك تكون معنا…

_بس انا ما فيي عيش بلا إبني …

_أياه أهم تبنيلو بيت بوطن إنسرق وإنحرق وضربو الجوع ..والأ تبنيلو قصر من بخور مطرح لا في جوع ولا عطش ولا مرض..

_إمي وبيي وإختي نادين شلّعولي قلبي أكتر ما شلّعلي صدري الحادث ..ما فيي عيش بلاهن ..

_مش قلبك وحدك شلّعوا قلوب كل اللبنانيي ..من هيك قعود حدي لغنّي انا وإياك لنادين يلّي حملت البافل ومشيت بصوتك ..ما في ورد بيطلب مي الورد بيبقى سكوت إذا ما سقيتو شوي شوي عالسكت بيموت ..مسوك هالمراية وشوف…

_شو بدي شوف ..

_صورة الورد…

_مين قصدك انا وإنت ..

_مظبوط نحنا متنا عالارض لنزهّر هون عند إجرين المسيح …إتحضّر طلت إم النور…

 

جان بو جدعون